سعده والعصفور والمدرسة للشاعر كريم ألعراقي

سعده بت شارعنه شكَره وسعده قارب ما رسه
راح يسكَــــيهه مطــرنه وبّرعمت بالمدرســــه
مكّلله بجفيه نيلي..والشرايط كَمبرات
تجي كَبل الطالبات
إشما يجيهه بالحلم
ترسمه بالغُبشه رسم
راسمه نخله طويله ..وبلم مكَلوب ونهر
وراسمه شمس الغروب..شمعه معتلكَه إبجرح
وراسمه رّحال بدوي..باديه بكلمة ملح
تالي ومكّملّه وجهه.. وذايبه كلمة ملح
وراسمتني آني عصفور المدينه
أبيض بلون الصُبح..
المعلمه شافت الدفتر وشّكت :
__ إنتي يرسملج أبوج ..هذا بدوي من صدكـَ
راح يصعــد للعثكـَ
وهذا عصفورج حقيقي..يريد يحجي..يريد بالمدرسه يطير
__ ست خطيه.. ست فقير..
__ أس..أسكتي ولا كلمه..
__ ست إذا أرسمله نجمه..
__ تحتركـَ..لا..تحتركـَ..
__ ست إذا تحضنها غيمة..ست..إذا..
__ لا تحتركـَ..
يفتح العصفور جنحه..للسماوات الزركـَ
يرَفرف َ العصفور جنحه..وتنطبكـَ
..الطفله.. حلّت ظفيرتهه
الطفله صفنت وانحنت
الطفله..جّفيّتهه نيلي
كـَطعت الدكـَمه وبجَت..
هـــيَ منين إلهـه رسـّام
عاجز أبوها وساكن بكَـــــبة إمام
الطفله..بالدمعات غركَت شهادتهه
..آني عصفور الطفوله..وما أكـــَوله :
هـيَّ رسمتني بديها واني شايل علامتهه
طحت من نخلتهه فحمه ليش شكّت مُعّلْمتّهه..؟
كريم العراقي
ليلة 11-12/2/1974
قطار بغداد_البصرة